Our Lady of Compassion — Seven Sorrows of the Blessed Virgin Mary
Sources: Traditional Roman Mass texts; shared sections and translations follow the source references.
Text Language
Readings and Mass Texts
Mass Readings
Introit
Joann 19:25; Joann 19:26-27
v. Stabant juxta Crucem Jesu Mater ejus, et soror Matris ejus, María Cléophæ, et Salóme et María Magdaléne.
Múlier, ecce fílius tuus: dixit Jesus; ad discípulum autem: Ecce Mater tua.
v. Stabant juxta Crucem Jesu Mater ejus, et soror Matris ejus, María Cléophæ, et Salóme et María Magdaléne.
Epistle
Judith 13:22, 23-25
Léctio libri Judith.
Benedíxit te Dóminus in virtúte sua, quia per te ad níhilum redégit inimícos nostros. Benedícta es tu, fília, a Dómino, Deo excélso, præ ómnibus muliéribus super terram. Benedíctus Dóminus, qui creávit cœlum et terram: quia hódie nomen tuum ita magnificávit, ut non recédat laus tua de ore hóminum, qui mémores fúerint virtútis Dómini in ætérnum, pro quibus non pepercísti ánimæ tuæ propter angústias et tribulatiónem géneris tui, sed subvenísti ruínæ ante conspéctum Dei nostri.
Gradual
Dolorósa et lacrimábilis es, Virgo María, stans juxta Crucem Dómini Jesu, Fílii tui, Redemptóris.
V. Virgo Dei Génetrix, quem totus non capit orbis, hoc crucis fert supplícium, auctor vitæ factus homo.
_
Tract
Thren 1:12
Stabat sancta María, cœli Regína et mundi Dómina, juxta Crucem Dómini nostri Jesu Christi dolorósa.
O vos omnes, qui tránsitis per viam, atténdite et vidéte, si est dolor sicut dolor meus.
Gospel
Joann 19:25-27
Sequéntia ++ sancti Evangélii secúndum Joánnem.
In illo témpore: Stabant juxta Crucem Jesu Mater ejus, et soror Matris ejus, María Cléophæ, et María Magdaléne. Cum vidísset ergo Jesus Matrem, et discípulum stantem, quem diligébat, dicit Matri suæ: Múlier, ecce fílius tuus. Deinde dicit discípulo: Ecce Mater tua. Et ex illa hora accépit eam discípulus in sua.
Offertory
Jer 18:20
Recordáre, Virgo Mater, in conspéctu Dei, ut loquáris pro nobis bona, et ut avértat indignatiónem suam a nobis.
Communion
Felices sensus beátæ Maríæ Vírginis, qui sine morte meruérunt martýrii palmam sub Cruce Dómini.
Sequence
Stabat Mater dolorósa
Juxta Crucem lacrimósa,
Dum pendébat Fílius.
_
Cujus ánimam geméntem,
Contristátam et doléntem
Pertransívit gládius.
_
O quam tristis et afflícta
Fuit illa benedícta
Mater Unigéniti!
_
Quæ mærébat et dolébat,
Pia Mater, dum vidébat
Nati pœnas íncliti.
_
Quis est homo, qui non fleret,
Matrem Christi si vidéret
In tanto supplício?
_
Quis non posset contristári,
Christi Matrem contemplári
Doléntem cum Fílio?
_
Pro peccátis suæ gentis
Vidit Jesum in torméntis
Et flagéllis súbditum.
_
Vidit suum dulcem
Natum Moriéndo desolátum,
Dum emísit spíritum.
_
Eja, Mater, fons amóris,
Me sentíre vim dolóris
Fac, ut tecum lúgeam.
_
Fac, ut árdeat cor meum
In amándo Christum Deum,
Ut sibi compláceam.
_
Sancta Mater, istud agas,
Crucifixi fige plagas
Cordi meo válida.
_
Tui Nati vulneráti,
Tam dignáti pro me pati,
Pœnas mecum dívide.
_
Fac me tecum pie flere,
Crucifíxo condolére,
Donec ego víxero.
_
Juxta Crucem tecum stare
Et me tibi sociáre
In planctu desídero.
_
Virgo vírginum præclára.
Mihi jam non sis amára:
Fac me tecum plángere.
_
Fac, ut portem Christi mortem,
Passiónis fac consórtem
Et plagas recólere.
_
Fac me plagis vulnerári,
Fac me Cruce inebriári
Et cruóre Fílii.
_
Flammis ne urar succénsus,
Per te, Virgo, sim defénsus
In die judícii.
_
Christe, cum sit hinc exíre.
Da per Matrem me veníre
Ad palmam victóriæ.
_
Quando corpus moriétur,
Fac, ut ánimæ donétur
Paradísi glória.
Amen.